AUSTRALIË. – ‘n Vrou (32) is van moord aangekla nadat die liggaam van ‘n 4-jarige seun by ‘n woning in Wyong, in die Australiese deelstaat Nieu-Suid-Wallis, aangetref is. Volgens die Australiese media ondersoek speurders ook bewerings dat kannibalisme moontlik by die saak betrokke was.
Volgens die Nieu-Suid-Wallis-polisie het die vrou haarself by die Wyong-polisiestasie aangemeld en verklarings gemaak wat beamptes genoop het om ‘n welsynsbesoek by die woning te doen. Die 4-jarige se liggaam is daar aangetref en die vrou is in hegtenis geneem. Sy is sedertdien van moord aangekla.
Die polisie beweer die 4-jarige was etlike dae dood voordat sy liggaam gevind is en dat hy ernstige beserings opgedoen het. Tuggerah Lakes-polisie se bevelvoerder, superintendent Chad Gillies, het gesê die toneel was uiters ontstellend vir die polisie en nooddienste wat daarop gereageer het.
Die vrou het reeds in die hof verskyn en bly in aanhouding. Die ondersoek na die omstandighede van die 4-jarige se dood duur voort. Monsters wat forensiese toetsing ondergaan, is van die binnekant van die vrou se mond geneem.
Bronne: NSW Police Force – amptelike mediaverklaring hier onder, 7NEWS Australia, ABC News Australia, The Guardian Australia
