GAUTENG. – Die sangeres Amanda Strydom herstel tans in ‘n Johannesburgse hospitaal nadat sy Vrydag geval het terwyl sy voorberei het om by die Innibos Kunstefees op te tree.
Die The South African Legends Museum het sowat 10 uur gelede op sosiale media bekend gemaak dat die nuus aanvanklik teruggehou is uit respek vir Strydom se privaatheid. Volgens die museum is sy ná die val in die hospitaal opgeneem en later na ‘n hospitaal in Johannesburg oorgeplaas, waar sy tans aansterk. Strydom vier vanjaar haar 47ste jaar in die musiekbedryf en word op 23 Julie 70 jaar oud.
Die South African Legends Museum het haar in 2020 as ‘n Lewende Legende vereer vir haar besondere bydrae tot die Suid-Afrikaanse kunste en het haar ‘n spoedige herstel toegewens.
