Die Departement van Korrektiewe Dienste sê Peet Viljoen is veilig in die Kgosi Mampuru II-korrektiewe sentrum en dat voorlopige bevindinge nie die bewering staaf dat hy deur ’n korrektiewe beampte gedreig is nie.
Woordvoerder Singabakho Nxumalo sê die departement het van die bewering bewus geword nadat Viljoen se vrou, Mel, dit Vrydagoggend by die gebiedskommissaris aangemeld het.
Volgens Nxumalo het die hoof van die korrektiewe sentrum en sy bestuurspan onmiddellik opgetree om die feite vas te stel.
Verskuiwing weens konflik met ander gevangenes
Die departement sê Viljoen is meegedeel dat hy na ’n ander afdeling verskuif sou word weens konflik met ander gevangenes.
Volgens Korrektiewe Dienste het Viljoen voor sy vrou se oproep geen dreigemente of kommer oor sy veiligheid aangemeld nie.
Amptenare het daarna die afdeling besoek, met Viljoen en die betrokke personeel gepraat en bevestig dat hy veilig is.
Die departement sê daar is tans geen getuienis wat ’n formele ondersoek na enige korrektiewe beampte regverdig nie.
“Die gevangene is veilig en die departement sal voortgaan om sy veiligheid en welstand te prioritiseer,” het Nxumalo gesê.
Nuusflits het vroeër Vrydag berig dat Mel Viljoen gesê het haar man het haar die oggend gebel en beweer dat hy gedreig is en vir sy veiligheid vrees.
