NOORD-KAAP. – Drie mans is in hegtenis geneem nadat 25 skape teruggevind is wat na bewering van ’n plaas by Van Zylsrus gesteel is.
AO Molefi Shemane, polisiewoordvoerder, sê die Kuruman-eenheid vir veediefstal en bedreigde spesies het Vrydag inligting oor die diefstal ontvang en later ’n bakkie en sleepwa wat by die beskrywing pas, in Kuruman opgespoor. Vier mans was in die voertuig, met een skaap agterop. Drie van die mans het probeer vlug, een van die vier is in hegtenis geneem.
Die ondersoek het die polisie na ’n abattoir in Olifantshoek gelei, waar 24 reeds geslagte skape gevind is. ’n 61-jarige, ’n 33-jarige en ’n 35-jarige man is in hegtenis geneem. 25 skape, ter waarde van sowat R38 800, is teruggevind. Die polisie is steeds op soek na die vierde verdagte.
Die verdagtes sal na verwagting binnekort op aanklagte wat met veediefstal verband hou in die hof verskyn .
