Die Nasionale Vervolgingsgesag (NVG) het borgtog suksesvol in die Pretoria Gespesialiseerde Handelsmisdaadhof teengestaan, waar landdros Setshogoe borgtog aan Petrus Jacobus Viljoen (57) geweier het. Viljoen staan tereg op 400 aanklagte van eiendomsbedrog in Johannesburg ter waarde van ongeveer R27 miljoen, asook aanklagte van korrupsie, diefstal, die gebruik van vervalste dokumente en vervalsing.
46 eiendomme van die Stad Johannesburg bedrieglik verkoop
Daar word beweer dat Viljoen en vyf ander verdagtes, wat nog voor die hof moet verskyn, tussen Januarie en Maart 2010 altesaam 46 eiendomme wat aan die Stad Johannesburg behoort het, bedrieglik aan niksvermoedende individue en maatskappye verkoop het sonder die munisipaliteit se medewete of toestemming.
Die beskuldigdes het na bewering verskeie dokumente vervals om die onregmatige oordrag van die eiendomme moontlik te maak. Dit het onder meer verkoopsooreenkomste, besluite wat voorgegee het dat dit deur die Stad Johannesburg en die Johannesburg Property Company (Edms.) Bpk. uitgereik is, volmagte vir die oordrag van eiendomme, beëdigde verklarings en aansoeke ingevolge artikel 68(1) van die Regulasies kragtens die Registrasie van Aktes Wet 47 van 1937 ingesluit.
Daar word verder beweer dat die beskuldigdes ’n beloning aan ’n adjunkregistrateur in diens van die destydse Departement van Grondsake betaal het om die registrasie van die transportaktes te vergemaklik.
Oudit bring die beweerde bedrog aan die lig
Die beweerde bedrog het aan die lig gekom toe die Stad Johannesburg ’n oudit van sy vaste bates gedoen en ongerymdhede ontdek het. Die munisipaliteit het hom daarna tot die Johannesburgse Hooggeregshof gewend vir ’n bevel om eienaarskap van die eiendomme te herstel. Die aansoek is toegestaan en die eiendomme is aan die Stad teruggegee.
Ná ’n polisieondersoek is Viljoen in 2010 in hegtenis geneem en het hy in die Pretoria Gespesialiseerde Handelsmisdaadhof verskyn. Die saak sou later van voor af voor ’n ander landdros aangehoor word. Kort voordat die saak weer op die hofrol geplaas is, het Viljoen egter in Mei 2025 Suid-Afrika verlaat.
Hy is op 16 Junie 2026 weer by die OR Tambo Internasionale Lughawe in hegtenis geneem nadat hy uit die Verenigde State van Amerika gedeporteer is.
Staat voer aan Viljoen is ’n vlugrisiko
Tydens die borgtogaansoek het staatsadvokaat Willem van Zyl Viljoen se vrylating teengestaan en die ondersoekbeampte se beëdigde verklaring aan die hof voorgelê.
Volgens die verklaring hou Viljoen ’n vlugrisiko in, veral omdat hy ná sy deportasie uit die VSA nie meer ’n permanente woonadres in Suid-Afrika het nie.
Die borgtogondersoek het ook aan die lig gebring dat die eiendom in Woodhill wat Viljoen as ’n alternatiewe woonadres verskaf het, reeds voor sy vertrek na die VSA verkoop is en dus nie meer tot sy beskikking is nie.
Die staat het verder aangevoer dat daar ’n risiko bestaan dat Viljoen met getuies kan inmeng. Daar is onder meer beweer dat hy die ondersoekbeampte ten tyde van sy inhegtenisneming gedreig het.
Borgtog geweier, saak uitgestel
Landdros Setshogoe het in sy uitspraak bevind Viljoen is ’n vlugrisiko en hy het nie daarin geslaag om die hof te oortuig die belang van geregtigheid regverdig sy vrylating op borgtog nie.
Borgtog is gevolglik geweier.
Die saak is tot 4 September 2026 uitgestel vir die beskikbaarstelling van die dossier en verdere gesprekke tussen die staat en die verdediging.
Uitgereik deur Lumka Mahanjana, NVG-streekwoordvoerder, Gauteng-afdeling: Pretoria.
*Persverklaring
