’n Unieke nuwe trofee is Woensdag in Johannesburg onthul vir Rugby’s Greatest Rivalry, die vier-toetsreeks tussen die Springbokke en die All Blacks.
Die trofee, wat spesiaal vir die herlewing van die tradisionele rugbytoere tussen Suid-Afrika en Nieu-Seeland ontwerp is, bestaan uit twee afsonderlike helftes wat deur magnete saamgetrek word.
Volgens SA Rugby simboliseer die ontwerp die sterk identiteit van elke rugbyland, maar ook die besondere band en eeue oue wedywering tussen die Springbokke en die All Blacks.
Die voormalige Springbokkaptein Gary Teichmann en voormalige All Black-kaptein Sean Fitzpatrick, wat hul onderskeie lande tydens die 1996-reeks aangevoer het, het die twee helftes tydens die amptelike bekendstelling vir die eerste keer in die openbaar saamgevoeg.
Die wenners van die vier-toetsreeks sal albei helftes van die trofee ontvang ná die laaste toets op 12 September 2026 in Baltimore in die VSA.
Indien die reeks met twee oorwinnings elk gelykop eindig, sal Suid-Afrika en Nieu-Seeland elk een helfte van die trofee hou.
Rian Oberholzer, uitvoerende hoof van SA Rugby, sê die doel was om ’n trofee te skep wat net so uniek soos die wedywering self is.
“Die idee was onder meer dat die trofee in twee verdeel kan word om die twee helftes van die wedywering te verteenwoordig, of dat elke land een helfte kan hou indien die reeks gedeel word,” het Oberholzer gesê.
Die trofee se vorm is deur ’n grashalm geïnspireer en bestaan uit twee individuele “lemme”, waarvan een Suid-Afrika en die ander Nieu-Seeland verteenwoordig.
Elke helfte is uit soliede aluminium vervaardig en bevat kunswerke deur kunstenaars uit die twee lande.
Die Suid-Afrikaanse helfte bevat werk deur Bonolo Chepape, wat fokus op die rol van gemeenskap, kultuur en gedeelde ervarings in die ontwikkeling van sportuitnemendheid.
Die Nieu-Seelandse helfte bevat kunswerk deur Kereama Taepa wat deur die Māori-skeppingsverhaal van Tāne en Whiro geïnspireer is.
Die basis van die trofee bestaan ook uit twee materiale: swart Pakohe-klip uit Nieu-Seeland en groen Verdite uit Suid-Afrika.
Die trofee is 65 cm hoog. Elke aluminiumhelfte weeg 7 kg en die basis weeg 9,5 kg. Die ontwerp- en vervaardigingsproses het ongeveer ’n jaar geduur.
Die publiek sal die trofee Saterdag vir die eerste keer kan sien wanneer die Springbokke en All Blacks mekaar in die eerste toets van die reeks op Ellispark in Johannesburg pak.
