GAUTENG. – Meer as 109 verbode items is Woensdag tydens onaangekondigde deursoekings by drie hoërskole in Alexandra gevind. Die polisiegeleide operasie is deel van pogings om dwelms, gevaarlike wapens en ander verbode items uit skole te hou.
Onwabile Lubhelwana, woordvoerder van die Gautengse departement van onderwys, sê die LUR, Lebogang Maile, was tydens die operasie by Hoërskool East Bank, Hoërskool Realogile en Hoërskool Alexandra. Sowat 40 items is by East Bank gevind, waaronder vapes, sigarette, vermoedelik dagga, skêre, messe, slypers en glasstukke. By Realogile is meer as 41 items, insluitend vapes, glasstukke, skêre en vuurhoutjiedosies, gevind. Meer as 20 muffins is ook gekonfiskeer en sal getoets word om vas te stel of dit verbode middels bevat. By Alexandra is 28 items gevind, waaronder vapes, 14 sakkies met ’n groen blaaragtige middel wat vermoedelik dagga is, vuurhoutjiedosies, gebreekte glas, vougereedskap met ’n mes en tang, ’n moersleutel en ander items. Drie vermoedelike daggajoints is ook gevind.
Maile sê die bevindinge is kommerwekkend en het ouers en gemeenskappe versoek om saam te werk om skole veilig te hou. Leerders wat met verbode items in hul besit gevind word, sal volgens skooldissiplinêre prosesse hanteer word, terwyl moontlike strafregtelike sake deur die polisie ondersoek sal word. Die departement sê soortgelyke onaangekondigde deursoekings sal voortgaan as deel van pogings om dwelmmisbruik, geweld, bendes en gevaarlike wapens in Gautengse skole te bekamp.
