NEPAL. – ’n Indiese toeris is dood en ’n Nieu-Seelandse toeris is beseer nadat twee helikopters vanoggend (Dinsdag) by ’n landingsplek naby Mount Everest in Nepal gebots het. ’n Nepalese vlieënier is ook beseer.
Die ongeluk het omstreeks 08:10 plaaslike tyd by Pheriche in die Solukhumbu-distrik op ’n hoogte van sowat 4 371 meter plaasgevind. Die oorledene is as die 47-jarige Vasanth Kumar Balaramudu geïdentifiseer. Hy was ’n passasier in ’n Fishtail Air-helikopter. Die beseerde Nieu-Seelander, Shailesh Krishna Patel, is saam met die vlieënier na ’n hospitaal in Kathmandu geneem.
Die twee helikopters is deur Fishtail Air en Air Dynasty bedryf. Die vliegtuie het gebots terwyl hulle by die Pheriche-landingsplek probeer land het. Videomateriaal wys hoe die rotorlemme mekaar tref voordat die helikopters op die grond neerstort.
Mukesh Dangol, direkteur-generaal van Nepal se Burgerlugvaartowerheid, het volgens The Kathmandu Post gesê voorlopige inligting dui op moontlike wankommunikasie tussen die vlieëniers. Die gebied val buite die beheertoring se lugverkeerbeheer by Lukla-lughawe, wat beteken vlieëniers moet direk met mekaar kommunikeer. Die presiese oorsaak van die ongeluk word nog ondersoek.
Pheriche is ’n gewilde oornag- en rusplek vir stappers en klimmers op pad na die Everest-basiskamp. Helikopters word gereeld in die berggebied gebruik om toeriste, klimmers en gidse te vervoer of te ontruim wanneer hulle weens siekte, uitputting of die uitdagende hoogte nie verder kan beweeg nie.
Bronne: The Kathmandu Post, 7NEWS Australia, Al Jazeera
