Action Society het die mandaat opgeneem om die vervolging in die saak van ’n 12-jarige se verkragting in Oktober 2025 in Bonteheuwel aktief te monitor. Die organisasie bied ondersteuning aan die kind se familie, hou die hofproses dop en plaas druk op die regstelsel om vertraging in forensiese ondersoeke te voorkom.
Volgens Kaylynn Palm, hoof van Action Society se Wes-Kaapse Aksiesentrum, vereis sulke sake dringendheid en sensitiewe hantering. “Hierdie kind het ernstige trauma gely. Wanneer noodsaaklike forensiese prosesse vertraag word, twyfel mens of geregtigheid behoorlik geskied,” sê Palm.
Volgens die kind se ma het die voorval op 8 Oktober 2025 tydens die skoolvakansie plaasgevind. Die 12-jarige het saam met bure se kinders gespeel toe hy ’n slaapkamer binnegegaan het en na bewering deur ’n onbekende volwassene seksueel aangerand is. Aanvanklik het hy weens dreigemente nie enigiemand van die voorval vertel nie, maar sy beserings is later deur sy familie ontdek. Hy is onmiddellik medies behandel en het hospitaalversorging benodig.
Die beskuldigde is op 19 November 2025 in hegtenis geneem en die saak is by die Bishop Lavis-landdroshof aanhangig gemaak. Die hofdatum is van 25 Maart na 8 April uitgestel. Action Society sal toesien dat die ondersoek sonder onnodige vertragings vorder.
Die 12-jarige ontvang berading en ondersteuning.
Druk hier om meer te lees.
