Na ’n hoëprofiel-ontmoeting in Washington tussen Donald Trump, Cyril Ramaphosa, Johann Rupert en verskeie ander rolspelers, het AfriForum se standpunt oor plaasmoorde, Julius Malema en die regering se houding weer sterk na vore gekom.
In ’n onderhoud ná die vergadering is AfriForum gevra of die beelde van Julius Malema wat Trump vertoon het, van hulle afkomstig was. Kallie Kriel sê hy kon nie sien of dit afkomstig is van die dokumentêr deur AfriForum nie.
“Maar ek dink dit was Trump self wat die saamgestelde video’s gewys het. Dit was nie óns video nie, maar ek sou trots gewees het as dit ons s’n was.”
Hy is deur eNCA gevra hoekom hulle trots sou wees op beelde wat Malema se omstrede uitsprake wys.
“Omdat dit wys hoe ’n politieke leier soos Malema haatspraak gebruik en hoe die regering dit nie veroordeel nie. Hy was wel in die Gelykheidshof, ja, maar die president het geweier om dit openlik te veroordeel – selfs ná ons briewe aan sy kantoor,” het Kriel in die onderhoud met eNCA gesê.
AfriForum het ook benadruk dat hulle versoek het dat plaasaanvalle as prioriteitsmisdaad verklaar word, iets wat die regering tot dusver geweier het.
“Ons het aan die president en die polisie geskryf; hulle het dit summier van die hand gewys. Maar ten minste, ná vandag, is hierdie kwessies nie meer onder die mat ingevee nie. Dis tyd dat daar eerlike gesprekke gevoer word.”
Op kritiek dat plaasmoorde nie die enigste misdaadkrisis in die land is nie, sê Kriel: “Ja, ons het altyd erken dat geweld ’n nasionale probleem is. Maar plaasmoorde is uniek. Geen ander misdaadkategorie word openlik aangemoedig deur openbare figure nie. Die wreedheid van plaasaanvalle is ook besonder ernstig, dit sluit marteling in. Niemand sê byvoorbeeld: ‘Ons moet nie fokus op geweld teen vroue nie, want daar is ook geweld teen mans’ nie. Maar as dit kom by plaasaanvalle, probeer mense dit afmaak of verswak. Dít is wat ons wil stop.”
AfriForum sê hulle is bereid om verder met die ANC te gesels.
“Ons wil ’n oplossing hê. Dít is ook ons land. Ons wil bou – nie breek nie. Maar ons gaan nie toekyk terwyl boere gemoor word en politici stilbly nie.”
Die gesprek in Washington het die wêreld se aandag gevestig op ’n kwessie wat vir baie lank as ’n plaaslike stryd gevoer is.
