WES-KAAP. – ‘n Base jumper is Maandag ná ‘n ongeluk op die Platteklipkloof-roete op Tafelberg dood gevind. Die voorval het met ’n groot soek-en-reddingsoperasie gepaardgegaan, waaraan verskeie grond- en lugspanne deelgeneem het. Drie valskermswewers is in die bestek van twee maande op Leeukop óf dood óf beseer.
Die Wildernis-soek-en-redding (WSAR) Wes-Kaap sê in ‘n sosialemediaplasing die vlerkpakspringer is kort voor 10:00 tydens die soektog gevind en dood verklaar. Sy liggaam is met ‘n helikopter uit die gebied gevlieg en aan owerhede oorhandig. Die operasie het onder andere Weskus Gesondheid EMS, SANParks, SAPS Soek-en-Reddingsdienste, ER24, Air Mercy Service en die Stad Kaapstad Wetstoepassing ingesluit.
WSAR het medelye teenoor familie, vriende en geliefdes van die oorledene uitgespreek. Vir noodgevalle kan die WSAR by 021 937 0300 gebel word.
Base Jumping is ’n sport waarin mense ‘n valskerm gebruik om van geboue, antennas, brûe of klowe te spring. Met die vlerkpak kan die springers horisontaal beweeg en hulle val beheer voordat die valskerm oopmaak. Alhoewel dit langer vlieg en beter beweegbaarheid bied, verhoog dit ook die risiko’s aansienlik.
Drie ongelukke het in twee maande op Leeukop met valskermsweef (paragliding) plaasgevind. Op 2 Januarie is ‘n valskermswewer (57) op die helling onder die Leeukop-parkeerearea beseer. Vroeg in Desember 2025 het ‘n Oostenrykse valskermswewer ‘n ongeluk oorleef en is tans in ‘n hospitaal aan die herstel. Op 25 November 2025 het Jean-Jacques Wallis, SA-vlerkpakkampioen, tragies tydens ‘n soortgelyke ongeluk gesterf.
