NOORDWES. – Die polisie vra die publiek se hulp om ‘n verdagte op te spoor nadat ‘n 66-jarige vrou Sondagaand tydens ‘n huisroof op ‘n plaas by Mamogaleskraal, naby Brits, ernstig aangerand is.
Sers. Kelebogile Morake, woordvoerder van die polisie, sê aan Nuusflits die vrou was alleen in haar huis toe sy glo ‘n venster hoor breek het. Sy het probeer om haar broer te bel, maar die verdagte was reeds in die huis. Die man het haar na bewering met ‘n graaf aangerand en beserings aan haar hande veroorsaak voordat hy met haar persoonlike besittings gevlug het. Sy is vir mediese behandeling in ‘n hospitaal opgeneem.
‘n Saak van huisroof word ondersoek terwyl die verdagte steeds op vrye voet is. Enigiemand met inligting wat die ondersoek kan help, kan sers. Phenyo Malese by 065 896 1641 bel.
