OOS-KAAP. – Ryno du Toit (38) se borg in die Gqeberha-landdroshof is suksesvol deur die nasionale vervolgingsgesag teengestaan. Hy staan tereg op ernstige Skedule 6-aanklagte, insluitend die verkragting van ’n 2-jarige seun en verskeie aanklagte wat verband hou met die besit, vervaardiging en verspreiding van kinderpornografiese materiaal.
NVG-woordvoerder, Luxolo Tyali, sê Du Toit is op 10 Januarie 2026 by sy huis in Sydenham, Gqeberha, in hegtenis geneem ná ’n wenk oor ’n selfoonnommer wat glo gebruik is om pornografiese materiaal te versprei. Volgens die staat is minstens tien video’s met kinderpornografiese inhoud op sy toestelle gevind. Daar word ook beweer dat hy die materiaal per e-pos versprei het en in 2025 ’n video vervaardig het waarin hy seksueel met ’n tweejarige seun betrokke is. Die kind se identiteit is nog onbekend en ondersoeke duur voort.
Du Toit het die aantygings ontken en aangedui dat hy onskuldig gaan pleit. Aanklaer Asavela Dweba het betoog dat die staat ’n sterk prima facie-saak het en dat die beskuldigde ’n vlugrisiko is weens die erns van die aanklagte. Die hof is meegedeel dat hy oor ’n paspoort beskik en moontlik met die ondersoek kan inmeng of digitale bewyse kan vernietig. Daar is ook kommer dat die minderjarige steeds in gevaar kan wees.
Die hof het bevind dat dit nie in belang van geregtigheid is om borg toe te staan nie, gevolglik is borg geweier. Die saak is vir verdere ondersoek tot 8 Junie uitgestel.
