GAUTENG. – ‘n Brasiliaanse burger is Sondagmiddag deur die polisie by OR Tambo Internasionale lughawe in hegtenis geneem. Kokaïen met ‘n geraamde straatwaarde van R8.7 miljoen is glo in sy bagasie gevind.
Brig. Athlenda Mathe, polisiewoordvoerder, sê beamptes het inligting ontvang van die transgender verdagte wat met sy aankoms vanuit Brasilië deursoek is. Tydens die deursoeking is verskeie pakkies versteekte kokaïen glo in sy bagasie ontdek.
Volgens die polisie maak dié inhegtenisneming deel uit van volgehoue operasies wat fokus op die bekamping van internasionale dwelmhandelnetwerke wat Suid-Afrika se grootste lughawe gebruik. Die verdagte sal na verwagting vandag (Dinsdag) op aanklagte van dwelmhandel in die Kempton Park-landdroshof verskyn.
Die polisie sê hulle het die afgelope tyd verskeie pogings om dwelms die land binne te smokkel, suksesvol gestuit. Hierdie optredes help om die vloei van onwettige middels te beperk en georganiseerde misdaad hok te slaan.
