WES-KAAP. – Die DA sê die wet moet sy loop neem nadat die Patriotic Alliance (PA) se burgemeesterskandidaat vir Kaapstad, Cheslyn Daniels, en sy vrou, Deveney Daniels, in hegtenis geneem is ná die beweerde aanranding van Daniels se eksvrou.
Patricia van der Ross, eerste ondervoorsitter van die DA se Kaapse metrostreek, sê die bewerings is ernstig en moet deur die strafregstelsel ondersoek word. Daniels is volgens die party na die Bellville-polisiestasie oorgeplaas. Die DA sê die polisie en vervolgingsgesag moet hul werk sonder politieke inmenging kan doen en dat geen politieke posisie of kandidatuur iemand bo die wet plaas nie. Van der Ross doen ook ’n beroep op die klaer om die regsproses sy loop te laat neem en nie toe te laat dat enige druk of politieke invloed haar beïnvloed om die klagtes terug te trek nie. Sy sê enige bewerings oor ’n vorige beweerde aanranding moet eweneens behoorlik ondersoek en deur getuienis vasgestel word.
Die DA meen geweld teen vroue en geslagsgebaseerde geweld moenie vir politieke doeleindes gebruik word nie en dat die feite deur die toepaslike regsproses na vore moet kom. Van der Ross het verder die PA se keuse van kandidaat bevraagteken en gesê die party sal nou binne enkele maande weer ’n burgemeesterskandidaat moet aanwys. Volgens haar laat dit vrae ontstaan oor die stabiliteit en geloofwaardigheid van die PA se leierskap.
