JOHANNESBURG. – ‘n Busbestuurder word ondersoek nadat tientalle ongedokumenteerde passasiers glo op ’n bus in die Vrystaat ontdek is.
Lees ook: Ongedokumenteerde Zimbabwiese burgers by padblokkade voorgekeer
Volgens die Border Management Authority (BMA) was die bus vooraf by die Beitbridge-grenspos goedgekeur voordat dit vertrek het. Die BMA hou verder vol dat die bus alle immigrasie- en weegbrugkontroles suksesvol geslaag het. Verder was die nodige dokumentasie in plek.
“Hulle het almal die vereiste dokumentasie ingevolge die grensoorsteekpermit gehad, en al die passasiers is behoorlik verwerk en tot die land toegelaat,” het die kommissaris van die BMA, dr. Michael Masiapato, gesê.
https://youtu.be/1ODc6Dm_O54?si=_M7UpdpTTCqfWw_d
Masiapato verduidelik dat alle busse by vertrek deur ’n weegbrug gaan om te verseker dat dit nie oorlaai of oorgewig is nie.
“Die betrokke bus het wel deur die weegbrug gegaan. Ons het rekords van die proses, insluitend beeldmateriaal, en die bus het aan alle vereistes voldoen.”
Hy het verder beklemtoon dat daar geen ekstra passasiers op die bus was toe dit Suid-Afrika binnegekom het nie en dat die saak volledig ondersoek sal word.
“Die bestuurder sal moet verduidelik waar die bykomende persone opgelaai is. Die bestuurder kan ook aangekla word vir hulpverlening ingevolge Artikel 59 van die Immigrasiewet,” het hy bygevoeg.
‘n Ondersoek na die voorval duur voort.
Bron: Border Management Authority SA BMA
SABC Nuus
