Byna een uit vier studente wat deur die nasionale finansiële hulpskema vir studente (NSFAS) befonds word, het nie aan die vereiste akademiese vorderingstandaarde voldoen nie en kon dus nie vir voortgesette befondsing in aanmerking kom nie. Dit blyk uit die jongste 2026-opdatering wat Donderdag deur die waarnemende voorsitter van die NSFAS-raad, dr. Mugwena Maluleke, bekend gemaak is.
Volgens Maluleke het 109 761 terugkerende universiteitstudente en 79 461 voortgesette TVET-kollegestudente nie die vereiste akademiese kriteria gehaal nie. In totaal is dit nagenoeg 190 000 studente wat hul finansiële ondersteuning kan verloor. Daarteenoor het 436 924 universiteitstudente en 127 503 TVET-studente wel aan die vorderingsvereistes voldoen en bly hulle vir befondsing kwalifiseer. Intussen is 660 039 eerstejaarstudente reeds vir 2026 goedgekeur. Nog 85 662 aansoeke word verwerk, terwyl 21 483 wag op uitstaande dokumentasie. Altesaam 116 266 aansoeke het nie aan die beurskriteria voldoen nie, maar 13 052 van dié studente is lenings aangebied.
NSFAS het ook bevestig dat die spesiale ondersoekeenheid meer as R1,7 miljard teruggevorder het wat weer in studentebefondsing belê sal word. Altesaam 91 937 appèlle is ontvang, waarvan 10 445 reeds goedgekeur is. Maluleke het studente en instellings versoek om dringend uitstaande dokumente en akademiese uitslae in te dien om verdere vertragings te voorkom.
Druk hier om meer te lees.
