WES-KAAP. – Die Stad Kaapstad se wetstoepassingsbeamptes het die afgelope finansiële jaar bykans 15 000 eenhede wat onwettig uit seelewebronne gestroop is, teruggevind. Dit is ’n aansienlike toename teenoor die vorige jaar.
Die mariene-eenheid het die hoeveelheid teruggevinde gestroopte mariene hulpbronne van 2 540 tot 14 967 verhoog, ‘n toename van sowat 489%. Volgens die stad is die verbetering onder meer te danke aan beter samewerking met ander wetstoepassingsagentskappe en ’n verbeterde inligtingsnetwerk. Wetstoepassingsbeamptes het ook 11 359 inhegtenisnemings uitgevoer, 172 vuurwapens en 1 710 rondtes ammunisie teruggevind, asook meer as 38 000 eenhede dwelms. In die 12 maande onder oorsig is 953 onwettige sjebeens gesluit, meer as ’n halfmiljoen boetes uitgereik en meer as ’n kilometer gesteelde koperkabel teruggevind. Beamptes het ook 247 voertuie wat met onwettige storting verbind word, geskut, terwyl 3 061 diere ingevolge oortredings van die wet gekonfiskeer is. Byna 37 000 vierkante meter graffiti is skoongemaak.
Volgens Alderman JP Smith, die burgemeesterskomiteelid vir veiligheid en sekuriteit, het die departement meer as 365 000 diensversoeke in die afgelope jaar hanteer, 17% meer as die vorige jaar. Smith sê die statistieke toon die impak van ’n groter fokus op wetstoepassing, misdaadvoorkoming en die afdwing van munisipale verordeninge.
