GAUTENG. – Fujia Chen (63), ‘n Chinese burger, is deur die polisie in samewerking met Interpol aan ’n Chinese afvaardiging oorhandig. Hy is tans op pad terug na China waar hy tereg sal staan op aanklagte van bedrog.
Luidens ‘n verklaring van nasionale polisiewoordvoerder, brig. Athlenda Mathe, word Chen daarvan beskuldig dat hy die Chinese regering na bewering met sowat R120 miljoen bedrieg het deur ’n ongeregistreerde buitelandse valutawisselbesigheid te bedryf. Volgens owerhede het hy in 2021 na Suid-Afrika gevlug nadat sy vermeende medepligtiges in China in hegtenis geneem is. Hy het glo sedertdien in Suid-Afrika geskuil totdat hy probeer het om vir ’n Amerikaanse visum aansoek te doen. Hy is daarna in hegtenis geneem en was die afgelope ses maande in aanhouding. ’n Uitleweringsbevel is op 20 Januarie toegestaan.
Lt.genl. Khosi Senthumule het tydens ’n vergadering met die Chinese afvaardiging ook terugvoer gegee oor die vordering met die opsporing van 18 ander Chinese voortvlugtiges wat glo in Suid-Afrika skuil. Volgens die polisie is 11 van hulle reeds op Interpol se rooi kennisgewing geplaas.
