Die DA het ‘n dringende ondersoek geëis nadat teenstrydige weergawes na vore gekom het oor die ontvangs van oudpresident Jacob Zuma en die Gupta-broer Ajay Gupta tydens ‘n onlangse besoek aan Indië.
Ryan Smith, die DA se woordvoerder oor internasionale betrekkinge en samewerking, sê Khumbudzo Ntshavheni, minister in die presidensie, het Anil Sooklal, die Suid-Afrikaanse hoë kommissaris in Indië, in die openbaar gekritiseer omdat hy Zuma en Gupta ontvang het. Volgens Smith is die situasie egter verwarrend omdat die parlementêre portefeuljekomitee oor internasionale betrekkinge en samewerking vroeër ingelig is dat Sooklal op skriftelike instruksies van die departement van internasionale betrekkinge en samewerking (Dirco) opgetree het. Die DA wil nou weet wie van Sooklal of Dirco die waarheid praat.
Smith sê indien dit bevestig word dat Dirco wel die opdrag gegee het om Zuma en Gupta amptelik te ontvang, sal dit ‘n ernstige skending van diplomatieke protokol wees. Die party het Ronald Lamola, minister van internasionale betrekkinge en samewerking, versoek om ‘n departementele ondersoek te gelas. Volgens die DA moet vasgestel word of Lamola en sy departement vooraf van die besoek geweet en dit goedgekeur het, en of Sooklal buite sy mandaat opgetree het. Die DA sê hy sal ook verdere skriftelike vrae aan Lamola rig om vas te stel wie vir die besluit verantwoordelik was.
Smith voer aan dat Suid-Afrika se buitelandse diens nie gebruik behoort te word om persone te ontvang wat met bewerings van staatskaping verbind word nie. Hy sê indien enige amptenare of die minister self by die besluit betrokke was, moet hulle aanspreeklik gehou word. Volgens die DA sal die party, as deel van die regering van nasionale eenheid (RNE), daarop aandring dat die volle waarheid oor die besoek aan die lig kom en dat gepaste stappe gedoen word indien enige oortredings plaasgevind het.
