GAUTENG. – Die DA-leier, Geordin Hill-Lewis, sal Woensdag ’n bejaarde vrou in haar 80’s van Mabopane besoek, wie se verkragtingsaak al sedert 2023 deur die hofstelsel sloer.
Die bejaarde slagoffer wag nou al bykans drie jaar vir geregtigheid. Volgens die DA is borgtog vir die beskuldigde vroeër suksesvol teengestaan en die saak word steeds fyn dopgehou. Die DA meen die aanhoudende vertragings wys hoe gebrekkig die strafregstelsel is en hoe swaar dit op slagoffers van geweldsmisdaad druk. Die party beklemtoon dat vertraagde geregtigheid neerkom op ontneemde geregtigheid, veral in sake van geslagsgebaseerde geweld.
Hill-Lewis sal tydens die besoek aan die bejaarde weer die DA se standpunt beklemtoon dat slagoffers eerste moet kom en dat oortreders vinnig aanspreeklik gehou moet word. Hy sal vergesel word deur die DA se federale voorsitter, Solly Msimanga, Tshwane se burgemeesterskandidaat, Cilliers Brink, streekvoorsitter Crezane Bosch, asook Ofentse Madzebatela, saam met raadslede en aktiviste.
Die besoek aan die bejaarde slagoffer vind Woensdag om 13:00 by Ya Bana Village in Winterveldt plaas.
