OOS-KAAP. – Die DA het xenofobiese, Islamofobiese en rassistiese aanvalle op Yusuf Cassim, sy provinsiale voorsitter, veroordeel nadat hy as adjunkminister van hoër onderwys en opleiding aangestel is.
Andrew Whitfield, die DA se provinsiale leier in dié provinsie, sê Suid-Afrikaners het die reg om politieke aanstellings en openbare ampsdraers se werk te kritiseer, maar dit moet nooit ontaard in aanvalle wat op iemand se ras, geloof, etnisiteit of vermeende herkoms gegrond is nie. Hy sê Cassim het reeds vir baie jare in verskeie openbare ampte gedien, onder meer as parlementslid, lid van die Oos-Kaapse wetgewer en hoofsweep van die DA in die provinsiale wetgewer. Volgens Whitfield behoort sy aanstelling beoordeel te word op grond van sy vermoë om die hoër onderwyssektor te verbeter en meer geleenthede vir studente te skep. Whitfield sê mense wat met Cassim se aanstelling verskil, is welkom om sy prestasie en besluite te beoordeel, maar daar is geen plek vir vooroordele of haatspraak in die politieke debat nie.
Hy voeg by dat die DA steeds verbind is tot ‘n nierassige Suid-Afrika waar mense op hul vermoëns, karakter en bydrae tot die land beoordeel word, eerder as op hul velkleur, van, geloof of afkoms.Die party doen ook ‘n beroep op politieke leiers, kommentators en die publiek om xenofobie, rassisme en godsdiensonverdraagsaamheid in alle vorme te verwerp.
