Die DA sê hy gaan wysigings aan die elektrisiteitsreguleringswet voorstel om te verhoed dat die nasionale energiereguleerder van Suid-Afrika (Nersa) weer kostesfoute met elektrisiteitstariewe maak. Om ‘n vorige tariefberekeningsfout van R54 miljard reg te stel, sal volgens die energie-reguleerder se eie ekonomiese impakstudie huishoudings sowat R10 miljard kos en kan tot die verlies van ongeveer 41 000 werksgeleenthede lei.
Kevin Mileham, DA-woordvoerder oor elektrisiteit en energie, sê die probleem is nie bloot ‘n eenmalige fout nie, maar spruit uit tekortkominge in die wetgewing wat Nersa se tariefbepalings beheer. Hy sê die DA sal daarom ‘n wysigingswetsontwerp op elektrisiteitsregulering by die parlement indien om die proses meer deursigtig, verantwoordbaar en wettig te maak. Die voorgestelde wetsontwerp sal onder meer terugwerkende tariefbesluite verbied, vereis dat ingrypende tariefverhogings nie as geringe administratiewe aanpassings voorgestel word nie, en openbare deelname verpligtend maak voordat beduidende tariefveranderings goedgekeur word.
Mileham sê die wetsontwerp sal ook onafhanklike en geouditeerde kostestudies vereis voordat munisipale elektrisiteitstariewe goedgekeur word, en groter regssekerheid vir verbruikers, munisipaliteite, beleggers en elektrisiteitsverskaffers skep.
Hy het ‘n beroep op die parlement se portefeuljekomitee oor elektrisiteit en energie gedoen om die wetsontwerp dringend te oorweeg sodra dit ingedien word.
