Natalie Helberg se verhaal begin met ‘n eenvoudige idee op die ouderdom van 14, toe sy net in gr. 8 was. Dit was ‘n gedagte wat vir haar aanvanklik dom gevoel het, maar soos die jare aangegaan het, het daardie gedagte gegroei en ontwikkel in iets baie groter. Toe sy matriek begin het, het sy een oggend wakker geword en besluit om haar droom ‘n werklikheid te maak. Sy het gedink: “Hoekom vat ek nie ‘n kans nie? Al bereik ek niks, kan ek sê ek het probeer.”
In net drie weke het Natalie die eerste boek in haar reeks, The Three Phases: Phase One, geskryf. Die idees het net gevloei, so baie dat sy boek twee en drie reeds klaar beplan het. Die tweede boek kom in September uit, ‘n bewys van haar toewyding en passie.
Natalie het haar boek self gepubliseer, wat beteken dat sy ook die bemarking self moes hanteer – ‘n enorme taak, veral tydens haar matriekjaar. Terwyl ander matrikulante vir die eksamen voorberei het, het Natalie haar tyd tussen skoolwerk en bemarking verdeel. En tog, binne ‘n week, het sy 500 TikTok-volgers gekry wat mal is oor haar boek. Sy het ook ‘n WhatsApp-groep met 700 lede wat aktief oor die boek gesels en idees deel.
Ondersteuning was altyd naby, veral van haar kêrel, Wiaan Nel, en sy familie. Haar ouers, wat in Pretoria bly, was in trane van trots toe hulle van haar prestasie hoor. Sy het selfs ‘n onwaarskynlike vriendin in Durban gevind, wat as proefleser opgetree het en emosioneel op elke toneel in die boek gereageer het. “Ek het gehuil van blydskap toe ek daarna luister,” sê Natalie, wat gevoel het sy het iets besonders bereik.
Wiaan het haar deur dik en dun ondersteun, van laatnag-koffiesessies tot klein vierings na elke nuwe follower op sosiale media. Hy en sy familie het haar gehelp om haar drome te bereik, met sy ma wat ‘n besondere rol gespeel het in die verspreiding van haar boek.
Natalie se inspirerende boodskap aan ander jong skrywers is eenvoudig, maar kragtig: “Dit maak nie saak waar jy vandaan kom nie. Jy kan enigiets bereik. Moet jouself nie met ander vergelyk nie, want jy het geen idee hoe amazing jou eie woorde is nie. As ‘n skrywer moet jy altyd ver dink en besef dat jy dalk iemand se lewe kan verander.”
Met haar oog op die voltooiing van The Three Phases-reeks in 2024 en ‘n moontlike loopbaan in die onderwys, is Natalie se toekoms helder. Sy is vasbeslote om vir altyd te skryf, ongeag of iemand dit lees of nie – al hoop sy natuurlik dat hulle wel sal.
Die verhaal van Natalie Helberg is ‘n inspirasie vir enigiemand wat groot drome koester. Sy het bewys dat ouderdom geen hindernis is om sukses te behaal nie, en haar reis is nog net aan die begin.
Die boek is op Amazon beskikbaar, dit bestaan uit 315 bladsye en is in Engels.
