GAUTENG. – ‘n Vrou is Woensdagoggend omstreeks 08:30 deur ‘n man met wie sy glo in ‘n verhouding betrokke was by Uitkyk Stationery Bookshop in Silverton in die rug geskiet, waarna sy gesterf het. Die man wat ‘n veiligheidswag was, het homself daarna in die kop geskiet en is onder polisiebewaking in die Steve Biko Akademiese Hospitaal opgeneem.
Kapt. Johan van Dyk, polisiewoordvoerder, sê in ‘n verklaring die polisie is na ‘n skietvoorval ontbied. Met aankoms is ’n diensvuurwapen op die grond aangetref met ’n veiligheidswag wat met ‘n skietwond in die kop in ’n plas bloed gelê het. In die winkel is die liggaam van die vrou met veelvuldige skietwonde aangetref. Paramedici het haar op die toneel dood verklaar.
Voorlopige ondersoeke het die romantiese verhouding wat onlangs konflik ervaar het, aangedui. Volgens inligting het die verdagte die winkel ingegaan waar die vrou agter die toonbank gewerk het. Hy het ’n vuurwapen uitgehaal en op haar gerig. Toe sy probeer wegloop, het hy haar twee keer in die rug geskiet en daarna verdere skote afgevuur wat haar noodlottig gewond het. Die verdagte het daarna die vuurwapen op homself gerig en ’n skietwond in die kop opgedoen. Hy is na Steve Biko Akademiese Hospitaal vervoer en word onder polisiebewaking gehou.
’n Saak van moord is geopen en ondersoeke duur voort.
Volunteer Emergency Medical Response Unit (VEMRU) is net voor 09:00 na die toneel ontbied. Twee persone met skietwonde is op die toneel aangetref. By verdere ondersoek is vasgestel dat een persoon noodlottige beserings opgedoen het, terwyl ’n tweede persoon in ’n kritieke toestand verkeer het nadat hy in die kop geskiet is. Verskeie dienste het saamgewerk om die beseerde te stabiliseer voordat hy na ’n nabygeleë hospitaal vervoer is. VEMRU bevestig verskeie nood- en-veiligheidsdienste, insluitend Emer-G-Med, Promed EMS, BestCare EMS, Pretoria Volunteer Emergency Services, Brinant Security en Axon Security, het op die toneel bystand gelewer.
