Matriekleerlinge begin vandag (Dinsdag) met hul finale eksamen. Die Gautengse departement van gesondheid doen ’n beroep op matrieks om hul geestesgesondheid en welstand tydens dié tyd te prioritiseer. Die departement waarsku dat oormatige druk, te min slaap en lang studeersessies konsentrasie, geheue en algemene welstand kan beïnvloed.
Steve Mabona, woordvoerder van die Gautengse departement van gesondheid, sê matrikulante moet realistiese studieroosters opstel, werk in kleiner gedeeltes verdeel en gereelde ruspouses neem. Leerlinge word aangeraai om genoeg te slaap, gereeld te eet en fisies aktief te bly, eerder as om hulself met oormatige kafeïen en energiedrankies deur lang studiesessies te probeer help. Ouers en versorgers word ook aangemoedig om ’n ondersteunende omgewing te skep en nie leerlinge oor hul akademiese prestasies te dreig, straf of te blameer nie.
Die departement herinner families daaraan dat eksamenuitslae nie ’n leerling se intelligensie, persoonlike waarde of hele toekoms bepaal nie. Waarskuwingstekens dat ’n leerling emosioneel sukkel, is aanhoudende hartseer of geïrriteerdheid, onttrekking van familie en vriende, veranderinge in slaap- of eetgewoontes en gevoelens van hopeloosheid. Enige verwysing na selfdood moet ernstig opgeneem word en vereis dringende professionele hulp.
Leerlinge en hul families kan ondersteuning by openbare gesondheidsfasiliteite, skoolondersteuningspanne en maatskaplike werkers kry. SADAG se 24-uur-tolvrye hulplyn is 0800 567 567, Childline South Africa is by 116 beskikbaar en Lifeline South Africa kan weeksdae tussen 08:00 en 17:00 by 011 715 2000 gekontak word.
