James David van der Beek, die Amerikaanse akteur wat wêreldwyd bekend geword het vir sy rol as Dawson Leery in die tienerdrama Dawson’s Creek, is in die ouderdom van 48 aan kanker oorlede.
Van Der Beek se familie het sy afsterwe met ’n hartroerende verklaring op sosiale media aangekondig : “Ons geliefde James David Van Der Beek is vanoggend vreedsaam oorlede. Hy het sy finale dae met moed, geloof en grasie tegemoet gegaan.”
James Van Der Beek het in die laat 1990’s bekend geword toe hy sowel tieners as volwassenes se harte gewen het met sy vertolking van die sensitiewe en passievolle Dawson Leery in die ikoniese TV-reeks wat van 1998 tot 2003 uitgesaai is. Dié rol het sy loopbaan internasionaal gevestig. Ná Dawson’s Creek was Van der Beek in verskeie films en televisiereekse te sien, insluitend Varsity Blues, en het selfs ’n spottende weergawe van homself in die komedie Don’t Trust the B—- in Apartment 23 gespeel.
In 2024 het hy aangekondig dat hy met stadium 3 kolorektale kanker gediagnoseer is – ’n siekte wat hy vir jare in stilte beveg het. In die afgelope tyd het hy sy gesondheid en familie se welstand bo alles gestel, totdat hy op 11 Februarie 2026 oorlede is.
Hy laat sy vrou, Kimberly, en hul ses kinders agter.
Bronne: James van der Beek Facebook-blad, AP News, Sky News, ABC News
