LEES OOK: AfriForum: Crimen injuria-aanklagte ondersoek teen TikTokker wat ‘vals aantygings van rassisme’ maak
Die minister van finansies, mnr, Enoch Godongwana, sal vandag om 14:00 die mediumtermynbegrotingsbeleid (MTBR) in die parlement ter tafel lê.
Die MTBR sluit die regeringsbeleidsdoelwitte en -prioriteite rakende die land se begroting, asook voorspellings vir die makro-ekonomie in. Dit projekteer die fiskale raamwerk oor die volgende drie jaar deur onder andere die uiteensetting van uitgawe- en inkomsteramings.
Ekonoom Frank Blackmore sê die land se moeilike ekonomiese situasie sal dit vir Enoch Godongwana, die minister van finansies, moeilik maak om ‘n begroting te lewer wat vir almal bevredigend is.
Besighede het gevra vir ‘n gebalanseerde MTBR wat Suid-Afrika se pogings om die land se skuldlas te verminder, sal bevorder. Godongwana sal vanmiddag die beleidsverklaring in Kaapstad lewer.
Blackmore sê dit sal interessant wees om te sien hoe Godongwana ‘n balans sal vind. “Die hoofkwessie gaan wees hoe ons die geldtekort gaan stuit. Gaan ons belasting verhoog, gaan ons meer leen, gaan ons na ons gebeurlikheidsfonds, gaan ons koste besnoei? “Die minister se hande is vasgebind met betrekking tot ’n verhoging in belasting, aangesien volgende jaar ’n verkiesingsjaar is en die feit dat ons redelik hoog belas word. Leen word moeiliker, wat die besnoeiing van koste en dalk die gebeurlikheidsfonds laat om die gaping tussen besteding en inkomste te oorbrug,” voeg Blackmore by.
Intussen sê Dawie Roodt, hoofekonoom van Efficient Group, die land se stygende skuldlas wat verlede jaar sowat R4,8 triljoen bereik het, sal na verwagting vanjaar nog verder eskaleer. Hy sê die land se groeiende begrotingstekort sal die regering se leenvereistes verhoog, wat met hoër rentekostes gepaard gaan.
#Begroting #Budget #Godongwana #Finansies #MTBPS #Afrikaans #Nuus
Bronne gebruik: Nasionale Tesourie persverklaring (11 September 2023); SABC Nuus; The Citizen.
