INTERNASIONAAL. – Die wêreld van vrouefietsry is tans aan die gons oor die beweerde gebruik van “bra-vulling” om die borsarea van vroulike deelnemers te vergroot en die lugvloei om die liggaam te verander. Die omstrede praktyk van chest fairing om die borsarea ast’ware meer vaartbelyn te maak, kan na bewering lugweerstand verminder en deelnemers tydens wedrenne ’n onregverdige voordeel gee.
Volgens deskundiges kan ’n kleiner bors die vorming van ’n soort “lugsak” op die hoogte van die fietsryer se buik bevorder, wat die lugweerstandskoëffisiënt effens verhoog. Bert Blocken, professor in aerodinamika aan Heriot-Watt Universiteit in Skotland, het byvoorbeeld aan die Britse koerant The Telegraph gesê dat chest fairing ’n vermindering in lugweerstand van tot 3,6% kan meebring. ‘n Groter borsvorm verander die lugvloei om die fietsryer se liggaam en kan gevolglik die weerstand verminder.
In ’n sportsoort waarin selfs die geringste voordeel ’n groot verskil kan maak, word hierdie praktyk as ’n onregverdige voordeel beskou.
Bronne: Oddity Central, Wieler Flits, The Telegraph
