INTERNASIONAAL. – Die Australiese eerste minister, Anthony Albanese, het aangekondig agt persone wat tydens die dodelike mesaanval by Bondi Junction ingegryp het om vreemdelinge te beskerm, vir hul dapperheid en moed gaan vereer word.
Volgens The Guardian sal die eerbewyse volgende jaar oorhandig word ná konsultasie met die regering van New South Wales.
Albanese het tydens ’n mediakonferensie gesê die eerbewyse sal “die beste van die mensdom” vier en hulde bring aan polisiebeamptes, mediese personeel en gewone burgers wat in die krisis opgetree het.
Die tragedie, wat ses mense dood en tien beseer het, het twee jaar gelede in ’n besige winkelsentrum in Sydney plaasgevind. Die aanvaller, Joel Cauchi, het tydens ’n psigotiese episode die sentrum met ’n mes binnegestap en ses mense doodgesteek. Nog tien slagoffers is beseer.
Onder diegene wat vereer sal word, is ’n polisiebeampte wat Cauchi doodgeskiet het, asook twee Franse mans en ’n veiligheidswag wat probeer het om hom te ontwapen.
Twee slagoffers – ’n ma wat haar baba in haar laaste oomblikke gered het en ’n veiligheidswag wat op sy eerste werksdag noodlottig gesteek is – sal postuum vereer word.
Nog tien mense is beseer voordat ’n inspekteur van die polisie in New South Wales, Amy Scott, Cauchi doodgeskiet het toe hy haar met ’n mes aangeval het. Cauchi, wat reeds as tiener met skisofrenie gediagnoseer is, was ten tyde van die aanval sonder medikasie en haweloos.
Scott sal een van die ses medaljes vir dapperheid in ontvangs neem as deel van Australië se Bravery Decorations-eerlys vir mense wat hulself tydens die voorval in gevaar gestel het.
Die goewerneur-generaal van Australië, Sam Mostyn, het gesê die ontvangers word gekenmerk deur hul “selflose, moedige en vasberade optrede in onuitspreeklike en grusame omstandighede.”
Bronne: The Guardian, ABC News
