Brekende Nuus
Nuus

Hierdie kosse kan kinders laat verstik

Foto: Ter illustrasie

Kosse soos heel druiwekorrels, worsies, springmielies en malvalekkers kan ’n kind se lugweg versper. Babas en jong kinders is veral kwesbaar terwyl hulle leer kou en sluk. Die Wêreldgesondheidsorganisasie (WGO) noem heel druiwekorrels en rou wortels as voorbeelde van kos wat in dié vorm ’n verstikkingsgevaar inhou. Die grootte, vorm en tekstuur van kos bepaal hoe maklik ’n kind dit kan kou en sluk.

Laat kinders regop sit terwyl hulle eet en hou toesig. Moenie dat hulle eet terwyl hulle loop, hardloop of speel nie. Die CDC en die Britse NHS gee spesifieke raad oor die voorbereiding en bediening van kos vir jong kinders.

Hoe herken jy ’n noodgeval?

Die Suid-Afrikaanse departement van gesondheid se riglyne onderskei tussen ’n kind wat nog doeltreffend kan hoes en ’n kind wie se lugweg ernstig versper is. As die kind nog hard kan hoes, moedig hulle aan om aan te hou hoes en bly by hulle. Kry onmiddellik noodhulp as ’n kind sukkel om asem te haal of skielik nie kan praat, huil of doeltreffend hoes nie. Moenie blindelings met jou vingers in die kind se mond na die kos soek nie. Noodhulp vir babas jonger as een jaar verskil van dié vir ouer kinders.

Watter kos hou ’n verstikkingsgevaar in?

KosHoe om die risiko te verminder
Heel druiwekorrels, kersietamaties en ander klein, ronde vrugteSny dit in die lengte in kwarte. Verwyder pitte waar nodig.
Rou wortels, harde appels, heel mieliepitte en heel boneRasper harde vrugte en groente of kook dit sag. Druk gaar mieliepitte en bone fyn vir babas.
Worsies soos Weense worsiesSny dit in die lengte in kort, dun repies en vermy ronde skyfies.
Taai vleis, groot stukke kaas en vleis of vis met beneSny vleis in klein stukkies of pluis dit. Rasper kaas en verwyder alle bene of grate.
Heel neute, sade en lepelsvol grondboontjiebotterGee neute fyngemaal. Smeer grondboontjiebotter dun op brood wanneer die kind reeds brood kan eet.
Springmielies, skyfies en harde peuselhappies soos pretzelsVermy dit vir babas en jong kinders.
Gomlekkers, harde lekkers, karameltoffies, malvalekkers en kougomVermy dit vir jong kinders. Die CDC noem ook taai vrugtehappies en gedroogde vrugte soos rosyne as moontlike verstikkingsgevare.

Die tabel bevat voorbeelde uit die Amerikaanse Sentrums vir Siektebeheer en -voorkoming (CDC) se lys en van die Britse NHS. As voedingsraad beveel die CDC ook aan dat babas en jong kinders kos met bygevoegde suiker of met lae- of kalorievrye versoeters vermy.

Bronne: Wêreldgesondheidsorganisasie (WGO), www.cdc.gov, Nasionale Departement van Gesondheid