BEIJING. — ’n Nuwe mylpaal in robotika is deur China bereik nadat ’n mensagtige (humanoïede) robot daarin geslaag het om ’n halfmarathon vinniger as enige mens nóg te voltooi.
Die helderrooi humanoïed, Lightning, is ontwikkel deur die Chinese tegnologiemaatskappy Honor. Lightning het die 21 km-wedloop in ’n indrukwekkende 50 minute en 26 sekondes voltooi. Dié tyd is meer as ses minute vinniger as die wêreldrekord van 57 minute en 20 sekondes wat deur die Ugandese atleet Jacob Kiplimo gehou word.
Lightning, wat 169 cm lank is, het met gemak oor die wenstreep gehardloop. Hy het sy kort voorarms gebruik vir balans en daar was geen tekens van moegheid nie. Tot dusver het die Verenigde State meer gevorderde humanoïedmodelle as China gehad, wat hierdie prestasie ’n beduidende sprong in die land se tegnologiese mededinging maak.
Sedert 2015 het China se robotika-bedryf vinnig ontwikkel nadat die regering dit as ’n strategiese sektor geïdentifiseer het om nywerhede te moderniseer. Humanoïed-robotika is in ’n 2023-beleidsdokument as ’n nuwe grens in tegnologiese mededinging beskryf, met ’n teiken vir massaproduksie teen 2025.
Die wêreld se eerste Humanoïede Robot-spele is verlede jaar in Beijing aangebied, wat dui op ’n groeiende oplewing in robot-sportgeleenthede.
Bron: CNN
France 24
