Internasionale lugrederye wat in Suid-Afrika sake doen, hoef voortaan nie meer aan swart ekonomiese bemagtigingsvereisgtes (SEB) te voldoen vir die verkryging of hernuwing van lugdienslisensies nie. Dit kom ná ’n hofbeslissing in die hooggeregshof in Pretoria.
Die hofsaak is deur Sakeliga gevoer en volgens die uitspraak is die Internasionale Lisensieraad vir Lugdienste (IASC) se praktyk om BEE- en rasgebaseerde kriteria by lisensieaansoeke te oorweeg, onregmatig verklaar en tersyde gestel. Die hof het bevind dat lisensie-aansoeke slegs op grond van bestaande wetlike kriteria soos veiligheid, operasionele vermoë en regulasies ingevolge die wet op internasionale lugdienste beoordeel moet word. Volgens Sakeliga beteken die uitspraak dat internasionale passasiers- en vraglugrederye voortaan sonder BEE-vereistes kan aansoek doen om lisensies, terwyl bestaande lisensies ook sonder sulke voorwaardes hernu kan word.
Die organisasie sê die uitspraak stuur ’n sterk boodskap aan internasionale ondernemings en regerings dat rasgebaseerde regulatoriese vereistes in Suid-Afrika suksesvol in die hof uitgedaag kan word waar dit nie wettig ondersteun word nie. Sakeliga het die saak geloods ná klagtes dat die lugvaartreguleerder reeds sedert 2023 BEE-vereistes in lisensiëringsprosesse begin toepas het, ten spyte daarvan dat dit nie uitdruklik in wetgewing voorsien word nie.
Druk hier om meer te lees.
