INTERNASIONAAL. – Ses lede van Iran se vrouesokkerspan het asiel in Australië gekry nadat hulle aan die AFC Women’s Asian Cup deelgeneem het. Een lid het intussen besluit om Australië te verlaat en na Iran terug te keer, nadat sy aanvanklik saam met spanmaats asiel oorweeg het.
Die span was in Australië vir die toernooi toe die oorlog tussen Iran en Israel/VSA net meer as ’n week gelede uitgebreek het. Die spelers het internasionale aandag getrek nadat hulle nie Iran se volkslied voor ’n wedstryd gesing het nie, wat vrese laat ontstaan het dat hulle by hul terugkeer in gevaar kan wees.
Volgens Guardian Australia het sewe spanlede aanvanklik humanitêre visums ontvang, maar een van die spelers het later van plan verander nadat sy met spanmaats gepraat het wat reeds Australië verlaat het.
Die Australiese minister van binnelandse sake, Tony Burke, het Woensdag bevestig dat die speler besluit het om terug te keer na Iran en die Iranse ambassade gekontak het. Dit het Australiese owerhede genoop om die ander spelers onmiddellik na ’n nuwe plek te verskuif nadat die ambassade bewus geword het van waar hulle tuisgegaan het.
Intussen het die ses oorblywende spanlede in Australië humanitêre visums ontvang wat vir 12 maande geldig is. Daarna kan hulle aansoek doen om permanente verblyf. Volgens Burke sal hulle toegang hê tot die volle reeks vestigingsdienste, insluitend hulp met Engels, werksoek en toegang tot opleiding en onderwys.
Iran se ministerie van buitelandse sake het intussen Australië daarvan beskuldig dat hulle die spelers “gyselaar hou”, maar het die span ook aangemoedig om huis toe terug te keer.
Bronne: Guardian Australia, Sky News
.
