BEIROET. – ’n Israeliese lugaanval het ’n gebou in sentrale Beiroet naby sakegebiede en hotelle verwoes, terwyl missielaanvalle voortduur in gebiede ver van waar die Iran-gesteunde Hezbollah sy sterkste teenwoordigheid het. Volgens die BBC het Israel ook begin met “beperkte grondoperasies” in die suide van Libanon.
Die oorlog in Libanon het op 2 Maart begin toe Hezbollah missiele op Israel afgevuur het ter ondersteuning van Iran in die voortgesette streekskonflik. Israel het met lugaanvalle gereageer en later troepe na die suide van Libanon ontplooi.
Volgens Libanon se gesondheidsministerie is minstens 912 mense sedert 2 Maart dood, onder wie ten minste 111 kinders.
Meer as ’n miljoen mense is intussen uit hul huise verdryf, hoofsaaklik in die suide en ooste van die land, asook in suidelike Beiroet waar Hezbollah sterk teenwoordig is. Lugaanvalle is egter nie tot dié gebiede beperk nie en tref ook ander dele van die hoofstad.
Bronne: BBC, DW
