LIMPOPO. – ‘n Vrou (18) sal na verwagting in verband met die moord op haar pasgebore baba in die Tzaneen-landdroshof verskyn. Die pasgebore baba is huilend uit ‘n puttoilet gered.
Kol. Malesela Ledwaba, polisiewoordvoerder, sê die jong vrou van Matswi het glo Sondagaand swangerskapkomplikasies ervaar. Die klaer het die volgende oggend opgemerk dat die vrou weg is, waarna na haar gesoek is. Gemeenskapslede het toe ’n baba hoor huil en die kind is in ’n puttoilet aangetref. Die pasgebore baba is met hulp van die gemeenskap uitgehaal en na ’n hospitaal geneem vir behandeling, maar het ’n paar dae later gesterf.
Die polisie het ’n moordsaak geopen en die ondersoek duur voort.
