INTERNASIONAAL. – Die bekroonde akteur Sam Neill, wat wêreldwyd bekendheid verwerf het as dr. Alan Grant in die Jurassic Park-rolprente, is vanoggend onverwags op 78-jarige ouderdom in Sydney, Australië, oorlede.
Sy familie het die nuus op Neill se amptelike Instagram-rekening bevestig. Volgens die verklaring was hy omring deur sy geliefdes en het hy “met die waardigheid wat sy hele lewe gekenmerk het” gesterf. Die familie sê sy dood was skielik en onverwags, maar dat hulle dankbaar is dat hy ten tyde van sy afsterwe kankervry was.
Die familie het die personeel van St Vincent’s-hospitaal in Sydney bedank vir hul sorg en gesê meer besonderhede oor sy afsterwe sal later bekend gemaak word.
Neill het in 2023 bekend gemaak dat hy met angio-immunoblastiese T-sel-limfoom, ‘n seldsame vorm van bloedkanker, gediagnoseer is. Hy het later gesê die kanker was in remissie nadat hy behandeling ontvang het.
Die akteur, wat in Noord-Ierland gebore is en in Nieu-Seeland grootgeword het, het oor meer as vyf dekades in rolprente en televisiereekse gespeel. Hy sal veral onthou word vir sy ikoniese rol as die paleontoloog dr. Alan Grant in Jurassic Park (1993), Jurassic Park III (2001) en Jurassic World Dominion (2022). Benewens die Jurassic-rolprente het Neill ook in bekende produksies soos The Piano, The Hunt for Red October, Dead Calm, The Tudors en Peaky Blinders gespeel.
Bronne: Sam Neill se amptelike Instagram-rekening, Associated Press (AP), CBS News, BBC News
