INTERNASIONAAL. – Koning Charles III en koningin Camilla het in die VSA aangekom vir ’n vierdaagse staatsbesoek ter viering van die 250ste herdenking van Amerikaanse onafhanklikheid, ondanks die skietery twee dae gelede by ‘n galadinee waar die koning se gasheer, Donald Trump, teenwoordig was.
Die koninklike egpaar het vroeër vandag vir president Donald Trump en die eerste dame, Melania Trump, by die Withuis vir tee ontmoet. Later het hulle ’n tuinpartytjie by die Britse ambassadeur se woning in Washington, DC bygewoon.
Die besoek vind plaas te midde van gespanne betrekkinge tussen die VSA en die VK weens die oorlog in Iran. President Trump het onlangs eerste minister Keir Starmer gekritiseer oor sy weiering om militêre steun aan die VSA te verleen.
Hoewel koning Charles volgens konstitusionele gebruik van partypolitiek moet wegbly, hoop die Britse regering dat sy besoek aan die VSA kan help om diplomatieke spanning te verlig.
Volgens berigte van Sky News is dit die eerste keer dat Charles die VSA as monarg besoek, en ook die eerste staatsbesoek deur ’n Britse monarg sedert 2007.
Bronne: Sky News, CNN
