MPUMALANGA. – ‘n Man is Dinsdag in Bosbokrand dood nadat ‘n kontant-in-transito-voertuig, ná ‘n beweerde aanval, twee keer oor hom gery het. ‘n Video-opname van die voorval, wat in Nuusflits se besit is, word wyd op sosiale media versprei.
Brig. Donald Mdhluli, polisiewoordvoerder, sê die kontant-in-transito-voertuig met twee veiligheidsbeamptes het stilgehou vir een om na ‘n nabygeleë winkel te gaan. ‘n Man het na bewering die passasiersdeur oopgemaak en die bestuurder met ‘n skerp voorwerp aangeval. Ander veiligheidsbeamptes wat gesien het wat gebeur het, het op die aanvaller geskiet. Die man het geval, waarna die bestuurder glo oor die man gery het. Hy is later op die toneel dood verklaar en is nog nie formeel geïdentifiseer nie. Sake van moord en poging tot roof word deur die polisie ondersoek.
Die polisie vra dat die grafiese video-opname weens trauma vir familielede van die man en sensitiwiteit van die publiek nie gedeel moet word nie.
