SAKHA (JAKOETIË). – Temperature van tot -52 grade Celsius, asook ander lesings van -51,7, -50,9 en -49,4 grade Celsius, is oor verskillende dae in Desember by weerstasies in Jakoetië in Rusland aangeteken. Dié aangetekende temperature van onder meer die Russiese Hidrometeorologiese Sentrum maak dit die koudste plek op aarde.
Volgens die Russiese Hidrometeorologiese Sentrum was die laagste lugtemperatuur wêreldwyd oor die voorafgaande 24 uur op 21 Desember in Jakoetië gemeet. Die temperatuur het in Jakoetsk -51,7 grade Celsius bereik, terwyl dit in die Olenkenski-distrik by die Sukhana-weerstasie tot -49,4 grade gedaal het. In die dorp Krest-Khaldzhay is ’n temperatuur van -48,7 grade aangeteken.
’n Amptenaar van die Russiese Hidrometeorologiese Sentrum het op 23 Desember gesê die temperatuur het die vorige dag tot -52 grade Celsius in die dorp Ytyk-Kel en by die Iema-weerstasie gedaal, wat dit die laagste temperatuur op aarde oor daardie 24-uur-tydperk gemaak het. Die Jakoet-weerstasie Khabardino was ook onder die drie koudste plekke ter wêreld, met ’n lesing van -50,9 grade Celsius.
Die amptenaar het verder gesê Australië en Paraguay was onder die wêreld se drie warmste plekke oor dieselfde 24-uur-periode.
Bronne: EADaily, TASS en Guinness World Records
