KAAPSTAD. – KWV-brandewyn het ‘n merkwaardige mylpaal bereik by die 2024 Internasionale Spiritualieëkompetisie (ISC), waar dit drie dubbelgoud-medaljes in die brandewynkategorie verower het. Van die ses dubbelgoud-medaljes wat wêreldwyd toegeken is, was KWV die enigste Suid-Afrikaanse vervaardiger wat hierdie gesogte erkenning ontvang het.
KWV se uitsonderlike prestasie versterk sy status as die wêreld se mees bekroonde brandewyn- en konjakhandelsmerk, met meer as dubbeld die aantal toekennings as hul naaste plaaslike mededingers. Hierdie prestasie maak KWV ‘n sterk mededinger vir die titel van beste brandewyn- en konjakvervaardiger – die finale uitslag sal op 26 September aangekondig word. ‘n Wen sal dit die sesde keer maak wat KWV hierdie gesogte titel verower.
Gestig in 1926, het KWV ‘n lang tradisie van brandewynvaardigheid. By hierdie jaar se ISC het KWV se toewyding aan kwaliteit uitgestaan deur dubbelgoud vir KWV VS (Potstill-brandewyn), KWV 3 (versnit), en KWV 12 (Potstill-brandewyn), asook goud vir KWV 5 (versnit), KWV 15, en KWV 20 (Potstill-brandewyn) te verower.
Die prestasie bevestig weereens KWV se prominente rol in Afrika se groeiende brandewynmark en onderstreep Suid-Afrika se toenemende belang in die internasionale drankbedryf.
