GAUTENG. – Vanoggend (Maandag) het die Gauteng-verkeerspolisie, die Suid-Afrikaanse polisiediens en die Tshwane-metropolisie hulle pogings vir padveiligheid vir leerlinge verskerp tydens ’n operasie in Soshanguve om veiligheid vir skoliervervoer te handhaaf. Daar is op sewe busse beslag gelê.
Volgens die provinsiale departement vir gemeenskapsveiligheid het die operasie gefokus op padveiligheid deur te kontroleer of openbarevervoeroperateurs, veral skoliervervoeroperateurs wat kwesbare passasiers – kinders – vervoer, aan die wet voldoen. Tydens die operasie is daar op sewe busse beslag gelê en boetes is uitgereik omdat hulle sonder permit bedryf is.
Die wetstoepassingsowerhede het beklemtoon dat hulle nie die versuim om verkeersregulasies na te kom, sal duld nie en dat diegene wat skuldig bevind word, die volle mag van die wet sal ervaar. Hierdie operasie vorm deel van die regering se ingryping om die veiligheid van alle padgebruikers te verseker.
