Die Demokratiese Alliansie (DA) het voorgestel dat die brandstof- en padongelukkefonds-heffings vir die duur van die olieprysskok met 50% verminder word, om huishoudings sodoende te beskerm teen die beplande styging van meer as R5 per liter brandstof en R9 per liter diesel. Gwede Mantashe het gesê die land is glo okay met brandstofreserwes. Lesers word aangemoedig om na die ingesluite video van die DA te kyk vir inligting oor die brandstofsituasie.
Volgens James Lorimer, die DA se woordvoerder van minerale en petroleumhulpbronne, het Suid-Afrika in die beeldmateriaal hier onder glo ‘n beduidende reserwe ru-olie. Die probleem is volgens Lorimer egter die voorraad van verwerkte brandstofprodukte omdat drie raffinaderye oor die afgelope jare gesluit is. Lorimer sê voorts daar is nie duidelikheid oor waar die verwerkte brandstofprodukte van die land vandaan kom nie, maar dat van die voorraad wel van die Persiese Golf afkomstig is. Hy het verlede week aan Gwede Mantashe, die minister van minerale en petroleumhulpbronne, gevra wat Suid-Afrika se posisie oor verwerkte brandstof is. Hy kon met goeie nuus rapporteer dat Mantashe vandeesweek op die portfoliokomitee-vergadering gesê het die land is okay met verwerkte brandstof tot die einde van April, waarná die voorsiening daarvoor goed is. Lorimer verduidelik ook dat slegs 20% van die land se ru-olie van die Persiese Golf afkomstig is, maar die res kom van Wes-Afrika.
Dr. Mark Burke, DA-woordvoerder oor finansies, sê baie minimumloonwerkers spandeer ’n groot deel van hul inkomste op vervoer en hoë brandstofpryse sal taxi- en voedselkoste opstoot en huishoudelike begrotings sal onder druk wees. Die DA erken dat ’n halwe verlaging van heffings R6,5 miljard aan inkomste kan beïnvloed, maar sê die skade om niks te doen nie, is waarskynlik groter. Hulle stel voor dat die regering verlore geld kan verhaal deur surplusse van die vergoedingsfonds en SETA’s te benut, asook die TARS-program effektief te gebruik om spookwerkers in staatsinstellings op te spoor. Burke doen ’n beroep op die regering om vinnige aksie te neem en beklemtoon dat Suid-Afrikaners nie die volle koste van internasionale olieprysskokke moet dra nie, veral terwyl daar steeds belastinggeld gemors word.
Druk hier om meer te lees.
