KWAZULU-NATAL. – Drie kinders is dood en elf ander beseer toe ’n taxi met leerlinge vanoggend (Donderdag) omstreeks 07:30 glo beheer verloor en teen ’n kleuterskool in die Imbali-gebied van Pietermaritzburg op die T6-pad vasgery het.
Craig Botha van KwaZulu Private Ambulance Service sê dié diens is na die chaotiese toneel ontbied. Paramedici het onmiddellik mediese hulp aan die beseerdes verleen. Die jongste ongelukslagoffers was tussen nege en 11 jaar oud. Die beseerdes, almal tussen nege en 15 jaar oud, was passasiers in die taxi op pad skool toe. Vier beseerdes het kritieke beserings opgedoen en het lewensreddende intervensie deur gevorderde nooddiensparamedici benodig. Vyf is ernstig beseer, terwyl een ligte beserings opgedoen het. Drie kinders het op die toneel aan hul beserings beswyk. Alle oorblywende beseerdes is na ‘n hospitaal vervoer.
“Ons innige meegevoel gaan aan die families en vriende van diegene wat hul lewens in hierdie ongeluk verloor het. Ons loof die moed en professionaliteit van ons paramedici wat onder uiters moeilike omstandighede onverpoos gewerk het,” het Botha gesê.
’n Volledige ondersoek na die oorsaak van die ongeluk is aan die gang.
