Waarskuwing: Die video kan sensitiewe lesers ontstel
VSA. – Iryna Zarutska (23), ’n Oekraïense vlugteling in die VSA, is op 22 Augustus op ’n trein in Charlotte, Noord-Carolina doodgesteek nadat sy op ‘n trein van die Lynx Blue Line geklim het. Die voorval word wyd veroordeel.
Volgens die ondersoekbeampte James C. Barnacle jr., het Zarutska kort ná haar aankoms by die East/West Boulevard-stasie in South End op ‘n trein geklim. Sy het in ‘n sitplek voor Decarlos Dejuan Brown jr., die verdagte, gaan sit. Ongeveer vier minute later het die verdagte ’n voumes uit sy sak gehaal, dit oopgevou en haar drie keer van agter gesteek, een keer in die nek. Die video van die voorval, wat wyd op sosiale media versprei word, wys hoe sy eers geskok haar gesig in haar hande het en dan vooroor op die grond val. Zarutska is op die toneel dood verklaar.
Die verdagte het by die volgende stop van die trein afgeklim en is kort daarna op die perron deur polisie in hegtenis geneem. ’n Federale klag is teen Brown gelê. Hy word ook van moord in die eerste graad aangekla.
Familie van Zarutska sê aan die televisiestasie WBTV sy het na die VSA gegaan om in vrede en veiligheid te lewe, maar haar lewe is haar ontneem op “die mees gruwelike wyse.”
Bronne: WBTV, U.S. Justice Department, The Independent
