KRUGERWILDTUIN. – SANParke beplan dissiplinêre optrede teen ‘n motoris wat ‘n leeuwyfie in die Krugerwildtuin gestamp het. Die voorval het op Vrydag 9 Augustus 2024 op die H1-4-roete tussen Satara en die Olifantskamp plaasgevind.
Volgens ‘n video wat wyd op sosiale media versprei is, het die motoris van ‘n Toyota Land Cruiser, wat ‘n karavaan gesleep het, tussen twee geparkeerde voertuie deurbeweeg terwyl ‘n trop leeus oor die pad loop. Hy het waarskuwings van ‘n ander motoriste geïgnoreer en in sy oënskynlike ongeduld ‘n leeuwyfie met sy voertuig gestamp.
SANParke het aangedui dat hul die saak ondersoek en dat onmiddellike aksie geneem sal word. Hul nasionale woordvoerder, Isaac Phaahla, het bygevoeg dat die registrasienommer deur gevorderde kamerategnologie opgespoor is en dat die motoris waarskynlik ‘n boete sal ontvang.
Ongelukkig word sulke voorvalle al meer algemeen in die Krugerwildtuin en ander Suid-Afrikaanse wildreservate.
