WES-KAAP. – ’n Vrou (76) was Woensdagoggend omstreeks 11:30 die teiken van ’n poging tot roof op die hoek van Warwick- en Upper Millstraat in Vredehoek, Kaapstad. Die voorval is op video vasgelê en twee verdagtes is reeds in hegtenis geneem.
Luidens ‘n verklaring van polisiewoordvoerder, konst. Ndakhe Gwala, het drie verdagtes probeer om die vrou se tas van haar af te neem. Toe sy weier, het hulle aan die tas getrek, maar sy het dit vasgeklou. Hulle het aanhouprobeer, tot sy op die grond geval en om hulp geskree het. Toe hulle besef hulle gaan gevang word, het hulle te voet gevlug.
Twee van die verdagtes, ’n 18- en ’n 19-jarige, is in hegtenis geneem. Die polisie is steeds op soek na die derde verdagte. Sodra hulle aangekla word, sal die verdagtes in die Kaapstad-landdroshof verskyn.
Foto’s: Verskaf
