Ruhan du Toit, die gewilde Afrikaanse sanger en liedjieskrywer met die goue stem, is terug met ’n nuwe enkelsnit Dit Sal Lekker Wees, Dankie, wat nou op digitale platforms beskikbaar is.
Fanie Nel van die Coleske Groep sê die liedjie dra ’n eenvoudige maar betekenisvolle boodskap oor om die lewe stadiger te neem en dankbaar te wees vir wat jy reeds het. In ’n wêreld waar mense gedurig na meer streef, herinner die snit luisteraars daaraan dat geluk dikwels in die klein, alledaagse dinge lê.
Die liedjie het ’n vars Afrikaanse country/rock-klank en is geskryf deur Ruhan du Toit, saam met Georic Lomas en Marco van Deventer. Dit bied ’n ligte, saamsing-gehalte wat maklik by gehore aanklank sal vind.
Volgens Ruhan is die tema iets waarmee baie mense kan vereenselwig, omdat dit nie oor een spesifieke ding gaan nie, maar oor enigiets wat vir ’n persoon geluk bring. Hy voeg by dat sy musiek uiteindelik deel wil wees van mense se herinneringe en spesiale oomblikke. ’n Liriekvideo sal ook beskikbaar wees om aanhangers die kans te gee om saam te sing.
Dit Sal Lekker Wees, Dankie kan nou geluister word op platforms soos Apple Music, Spotify en Deezer.
