Gayton McKenzie, die minister van sport, kuns en kultuur, het aangekondig dat Leon Schuster, die akteur, sanger en rolprentmaker, en Alfred Ntombela, sy jarelange medester, vandeesmaand met ‘n spesiale toekenning vereer sal word.
McKenzie het gesê dit was vir hom ‘n voorreg om die twee legendes by Schuster se huis te besoek. Hy het hulle geloof vir die bydrae wat hulle oor dekades tot die Suid-Afrikaanse vermaakbedryf gelewer het. Volgens McKenzie het Schuster en Ntombela met hul rolprente en optredes miljoene mense laat lag en ‘n unieke Suid-Afrikaanse nalatenskap geskep.
Geen verdere besonderhede oor die toekenning of die seremonie is in hierdie stadium bekend gemaak nie. Die 19de South African Sport Awards-seremonie vind op Sondag 23 Augustus 2026 plaas.
