GAUTENG. – Die Madlanga-kommissie het een jaar nadat dit met sy eerste sitting begin het, 110 getuies oor 174 dae se verhore aangehoor. Die kommissie is ingestel ná bewerings deur lt.genl. Nhlanhla Mkhwanazi oor misdaad, politieke inmenging en korrupsie in die strafregstelsel.
Jeremy Michaels, woordvoerder van die kommissie, sê die ondersoek het sedert die eerste verhoor op 17 September 2025 aansienlike vordering gemaak. President Cyril Ramaphosa het die kommissie in Julie 2025 ingestel, met regter Mbuyiseli Madlanga as voorsitter en adv. Sesi Baloyi SC en adv. Sandile Khumalo SC as mede-kommissarisse. Die kommissie het sedertdien 26 352 bladsye se transkripsies van mondelinge getuienis en 105 282 bladsye se dokumentêre bewysmateriaal ontvang. Getuies sluit onder meer SAPS-lede, Valke- en ander wetstoepassingsbeamptes, NPA- en IPID-amptenare, parlementslede, ’n kabinetsminister, private individue en deskundiges in.
Die kommissie het ook 1 894 oproepe en 4 548 e-posse van lede van die publiek ontvang, terwyl 22 aansoeke vir verhore agter geslote deure oorweeg is. Verder is drie aansoeke in die Hooggeregshof hanteer. Dit sê die ondersoek sal voortgaan sonder vrees, guns of vooroordeel.
